المقادير:
كوب ميه
كوب دقيق
ملعقة كبيرة زيت أو زبدة
3 بيضات
ذرة ملح
زيت للتحمير
فانيليا
ودي مقادير شربات بلح الشام:
1/2 كوب سكر
3/4 كوب ميه
عصير ليمونة
الطريقة:
1- لتحضير الشربات: اخلطي الميه مع السكر وحطّيهم على النار لمدة نصف ساعة،
وبعد كده ضيفي عليهم عصير الليمون، وسيبيه على النار لغاية ما تحسي إن
الشربات بقى تقيل، وبعد كده ارفعيه من على النار وسيبيه يبرد.
2- انخلي الدقيق، واخلطيه مع الملح، وبعد كده هاتي صينية وحطّي فيها الميه
ومعاها معلقة زيت أو زبدة، وحطّيها على النار، ولما تلاقي الميه بدأت في
الغليان، ضيفي عليها الدقيق مرة واحدة، بس خدي بالك إنك تهدّي النار وتقلبي
الخليط مع بعضه كويس علشان العجين ما يتجمعش ويسيب أثر في الصينية.
3- بعد كده ارفعي الصينية من على النار وسيبي العجينة لغاية ما تبرد، وبعد
كده حطّي عليها البيض واحدة واحدة مع التقليب باستمرار لغاية ما تحسّي إن
العجينة بقت طرية في إيدك، وماتنسيش تحطّي شوية فانيليا.
4- حمّري بلح الشام في زيت غزير وبارد؛ علشان يطلع مقرمش معاكي.
5- سيبي بلح الشام في الزيت لغاية ما تلاقي لونه بقى دهبي، وبعد كده شيليه من على النار وحطيه في مصفاة؛ علشان يتصفى منه الزيت.
6- سيبي بلح الشام لغاية ما يبرد وبعد ما يبرد حطيه في الشربات، وبعد خمس
دقائق شيليه وحطيه في مصفاة تانية؛ علشان يتصفى منه الشربات، بعد كده حطّيه
في طبق التقديم، ورشي عليه جوز الهند أو أي مكسرات عندك.. وبالهنا والشفا.